ઈઝરાયેલના વડાપ્રધાન બેન્જામિન નેતન્યાહુના ઘર પર ફરી હુમલો , જો કે કોઇ જાનહાનિ નહીં

ઈઝરાયેલના વડાપ્રધાન બેન્જામિન નેતન્યાહુના ઘર પર ફરી હુમલો કરવામાં આવ્યો છે. ટાઈમ્સ ઓફ ઈઝરાયલના જણાવ્યા અનુસાર, સીઝેરિયામાં વડાપ્રધાનનેતન્યાહુના ઘર પર ફરી હુમલો કરવામાં આવ્યો છે. પીએમના ઘર તરફ બે ગોળાઓ ફેંકવામાં આવ્યા હતા, જે ઇઝરાયેલના પીએમના ઘરના આંગણામાં પડ્યા હતા. ઇઝરાયેલ પોલીસે આ વાતની પુષ્ટિ કરી છે. જોકે, આ હુમલો કોણે અને ક્યાંથી કર્યો તે અંગે પોલીસે કોઈ માહિતી આપી નથી.

-> સુરક્ષા એજન્સીઓએ હુમલા અંગે નિવેદન જારી કર્યું છે :- વડાપ્રધાન બેન્જામિન નેતન્યાહુના ઘર પર થયેલા હુમલાને લઈને ઈઝરાયેલની સુરક્ષા એજન્સી શિન બેટે નિવેદન જારી કરીને કહ્યું કે, ‘આ ઘટનામાં કોઈ નુકસાનના સમાચાર નથી. હુમલા સમયે વડાપ્રધાન નેતન્યાહૂ અને તેમનો પરિવાર તેમના નિવાસસ્થાને હાજર ન હતા. જો કે આ ઘટનાની ઝીણવટભરી તપાસ
શરૂ કરવામાં આવી છે.

-> હિઝબુલ્લાએ પહેલા નિશાન બનાવ્યું હતું :- પીએમ નેતન્યાહુને એક મહિનામાં બીજી વખત સીધુ નિશાન બનાવવામાં આવ્યા છે. આ હુમલા પહેલા 19 ઓક્ટોબરે હિઝબુલ્લાએ વડાપ્રધાન બેન્જામિન નેતન્યાહુના ઘર પર ડ્રોન હુમલો કર્યો હતો. હુમલામાં ઉપયોગમાં લેવાયેલું ડ્રોન નેતન્યાહુના ઘરની નજીક એક બિલ્ડિંગ પર પડ્યું હતું.

-> વિપક્ષે કરી હુમલાની નિંદા :- ઈઝરાયલના વડાપ્રધાનના ઘર પર થયેલા આ હુમલાની ઈઝરાયેલના તમામ રાજકીય પક્ષોએ સખત નિંદા કરી છે. વિપક્ષી નેતાઓ યાયર લેપિડ અને બેની ગેન્ટ્ઝે આ હુમલાના દોષિતો સામે કડક કાર્યવાહીની માંગ કરી છે.

તે જ સમયે, ઇઝરાયેલના સંરક્ષણ પ્રધાન ઇઝરાયેલ કાત્ઝે સોશિયલ મીડિયા પર કહ્યું, ‘હદ
વટાવી દેવામાં આવી છે. સુરક્ષા એજન્સીઓએ આ મામલે તાત્કાલિક પગલાં લેવા જોઈએ.