રામનાથ કોવિંદની નેતૃત્વવાળી પેનલે ‘વન નેશન વન ઇલેક્શન’ પર રાષ્ટ્રપતિને સોંપ્યો રિપોર્ટ
દેશના પૂર્વ રાષ્ટ્રપતિ રામનાથ કોવિંદની અધ્યક્ષતાવાળી પેનલે 'એક દેશ એક ચૂંટણી'ને લઈને રાષ્ટ્રપતિ દ્રૌપદી મુર્મુને પોતાનો રિપોર્ટ સોંપ્યો છે. 18,626 પેજના આ રિપોર્ટમાં ઘણી મહત્વપૂર્ણ બાબતોનો ઉલ્લેખ કરવામાં આવ્યો છે. તમને જણાવી દઈએ કે આ સમિતિની રચના ગયા વર્ષે 2 સપ્ટેમ્બરે કરવામાં આવી હતી. તેની રચના થઈ ત્યારથી, આ સમિતિએ હિતધારકો અને નિષ્ણાતો સાથે વ્યાપક પરામર્શ કર્યા પછી જ આજે આ અહેવાલ સુપરત કર્યો છે.
-- સૂચનો માંગવામાં આવ્યા હતા :- નોંધનીય છે કે ગયા મહિને જ ભારતીય જનતા પાર્ટીએ કોવિંદ સમિતિને એક દેશ એક ચૂંટણી પર પોતાનો અભિપ્રાય આપ્યો હતો. આ પછી બીજેપી અધ્યક્ષ જેપી નડ્ડા પણ રામનાથ કોવિંદની અધ્યક્ષતાવાળી સમિતિને મળ્યા હતા. તમને જણાવી દઈએ કે ભાજપે તેના છેલ્લા બે મેનિફેસ્ટોમાં એક દેશ, એક ચૂંટણીની વકાલત કરી છે. જો કે તેનો અમલ કેવી રીતે કરવો તે અંગે પક્ષ દ્વારા સૂચનો માંગવામાં આવ્યા છે.
-- કોઇ એક પક્ષ કે ગઠબંધનને બહુમતી ન મળે તો ? :- કોઇ એક પક્ષ કે ગઠબંધનને બહુમતી ન મળવાના સંજોગોમાં શું ભાજપ વર્તમાન વિધાનસભાઓનું વિસર્જન કરીને એક સાથે ચૂંટણી કરાવવાના પક્ષમાં રહેશે? શું આ અંગે બંધારણમાં કોઈ સુધારો સૂચવવામાં આવશે? જો કોઈ એક પક્ષ કે ગઠબંધનને બહુમતી ન મળે તો આવી સ્થિતિમાં શું કરવું જોઈએ? આ સમિતિએ આ તમામ મુદ્દાઓ પર સંપૂર્ણ ધ્યાન આપ્યું છે. અને વિવિધ રાજકીય પક્ષો પાસેથી તેમના અભિપ્રાય પણ લીધા હતા.
-- ગત વર્ષે સપ્ટેમ્બરમાં સમિતિને ભલામણોનું કામ સોંપાયું હતું :- તમને જણાવી દઈએ કે વડાપ્રધાન નરેન્દ્ર મોદીએ ઘણી વખત એક દેશ, એક ચૂંટણીની વાત કરી છે અને આ મુદ્દા પર રાષ્ટ્રીય ચર્ચાનું પણ આહ્વાન કર્યું છે. તમને જણાવી દઈએ કે ગયા વર્ષે સપ્ટેમ્બરમાં રચાયેલી પૂર્વ રાષ્ટ્રપતિ રામનાથ કોવિંદની અધ્યક્ષતામાં બનેલી સમિતિને લોકસભા, રાજ્ય વિધાનસભાઓ, નગરપાલિકાઓ અને પંચાયતોની ચૂંટણીઓ એકસાથે કરાવવાના મુદ્દા પર શક્ય તેટલી વહેલી તકે વિચારણા અને ભલામણો કરવાનું કામ સોંપવામાં આવ્યું હતું.
