બુલેટ ટ્રેનને લઈને નવી અપડેટ આવી સામે, જાણો વિલંબનું કારણ
બુલેટિન ઈન્ડિયા : દેશવાસીઓ હવે રાહ જોઈ રહ્યા છે કે બુલેટ ટ્રેન ક્યારે પાટા પર દોડશે. હવે બુલેટ ટ્રેનને લઈને એક નવું અપડેટ સામે આવ્યું છે. રેલ્વે મંત્રી અશ્વિની વૈષ્ણવે જણાવ્યું હતું કે ભારતની પ્રથમ બુલેટ ટ્રેન માટે અનેક સ્ટેશનોના નિર્માણમાં પ્રગતિ થઈ છે. આ પ્રગતિ પછી, એવી અપેક્ષા છે કે પ્રથમ બુલેટ ટ્રેન વર્ષ 2026 સુધીમાં પાટા પર દોડવાનું શરૂ કરશે. વૈષ્ણવે કહ્યું કે અમદાવાદ-મુંબઈ રૂટ પર બુલેટ ટ્રેનનું કામ ખૂબ જ સારી રીતે ચાલી રહ્યું છે.
બુલેટ ટ્રેન પ્રોજેક્ટ અંગે કેન્દ્રીય મંત્રીએ કહ્યું કે તે ખૂબ જ જટિલ પ્રોજેક્ટ છે. આ પ્રોજેક્ટ પર કામ વર્ષ 2017માં શરૂ થયું હતું. ટ્રેનની ડિઝાઈન તૈયાર કરવામાં લગભગ અઢી વર્ષનો સમય લાગ્યો હતો. બુલેટ ટ્રેન પ્રોજેક્ટમાં વિલંબ અંગે કેન્દ્રીય મંત્રીએ કહ્યું કે કોવિડ મહામારી પણ બુલેટ ટ્રેન પ્રોજેક્ટમાં વિલંબનું કારણ હતું. મહારાષ્ટ્રમાં ઉદ્ધવ ઠાકરેની સરકારે મંજૂરી આપવાનો ઇનકાર કર્યો હતો, જેના કારણે પ્રોજેક્ટમાં વિલંબ થયો હતો. પરંતુ હવે કામ ખૂબ જ સારી રીતે ચાલી રહ્યું છે.
બુલેટ ટ્રેન કોરિડોરમાં 21 કિલોમીટર લાંબી ટનલ છે. જેમાં પાણીની અંદરના 7 કિમી વિસ્તારનો પણ સમાવેશ થાય છે. આ ટનલનું સૌથી ઊંડું બિંદુ 56 મીટર છે. ટનલની અંદર 300-320 કિમી પ્રતિ કલાકની ઝડપે બુલેટ ટ્રેન દોડશે. તેનો હેતુ જાપાનની શિંકનસેન ટેક્નોલોજી (બુલેટ ટ્રેન તરીકે પણ ઓળખાય છે)નો ઉપયોગ કરીને મુંબઈ અને અમદાવાદ વચ્ચે હાઈ-સ્પીડ રેલનું નિર્માણ કરીને હાઈ-ફ્રિકવન્સી ટ્રાન્સપોર્ટેશન સિસ્ટમ વિકસાવવાનો છે.
