લુધિયાણામાં ફ્લાયઓવર પર ઓઇલ ટેન્કર ડિવાઇડર સાથે અથડાતાં ભીષણ આગ ફાટી નીકળી
લુધિયાણાના ખન્નામાં ભીષણ આગ લાગી હતી. પંજાબના લુધિયાણામાં ફ્લાયઓવર પર ઓઇલ ટેન્કર ડિવાઇડર સાથે અથડાયા બાદ કાળા ધુમાડાના ગોટેગોટા આકાશમાં આવી ગયા હતા.
પંજાબના લુધિયાણામાં ખન્ના વિસ્તાર નજીક એક ફ્લાયઓવર પર બુધવારે એક ફ્યુઅલ ટેન્કર ડિવાઇડર સાથે અથડાઇને પલટી ગયા બાદ ભીષણ આગ ફાટી નીકળી હતી.
અકસ્માત બાદ જાડા અને કાળા ધુમાડાના ગોટેગોટા આકાશમાં ધસી આવ્યા હતા જેના કારણે ફ્લાયઓવર અને નજીકના વિસ્તારોમાં ટ્રાફિક અટકી ગયો હતો. ઘટનાની જાણ થતાં જ સિવિલ અને પોલીસ પ્રશાસન સહિત ચારથી પાંચ ફાયર ટેન્ડરો ઘટના સ્થળે દોડી આવ્યા હતા.
આગની જ્વાળાઓને કાબૂમાં લેવાના પ્રયાસો ચાલુ છે. અત્યાર સુધી કોઇ જાનહાનિ કે ઇજાના સમાચાર નથી. દુર્ઘટનાનું ચોક્કસ કારણ હજી સુધી જાણી શકાયું નથી.
"અમને બપોરે 12.30 વાગ્યે માહિતી મળી હતી કે ફ્લાયઓવર પરના ડિવાઇડર સાથે અથડાયા પછી એક ઓઇલ ટેન્કરમાં આગ લાગી છે. સિવિલ અને પોલીસ પ્રશાસન સાથે 4-5 ફાયર ટેન્ડર તાત્કાલિક ઘટના સ્થળે પહોંચી ગયા હતા. પરિસ્થિતિ નિયંત્રણમાં છે. એસ.એસ.પી. ખન્ના અમનીત કોંડલે જણાવ્યું હતું કે, ટ્રાફિકને ડાયવર્ટ કરવામાં આવ્યો છે.
ઉલ્લેખનીય છે કે, પંજાબના ઘણા ભાગોમાં ઠંડા હવામાનની સ્થિતિ પ્રવર્તી રહી છે, લુધિયાણા અને પટિયાલામાં અનુક્રમે લઘુત્તમ તાપમાન 7.6 ડિગ્રી સેલ્સિયસ અને 8 ડિગ્રી સેલ્સિયસ નોંધાયું છે. આવી જ સ્થિતિ પડોશી હરિયાણામાં પણ નોંધાઈ હતી.
