બાંગ્લાદેશી ક્રિકેટર શાકિબ અલ હસને રાજકારણમાં કર્યું ડેબ્યૂ, 2024ની ચૂંટણી પર નજર
બાંગ્લાદેશના ક્રિકેટ કેપ્ટન શાકિબ અલ હસને રાજકારણમાં ઝંપલાવ્યું છે અને તે આવતા વર્ષે યોજાનારી સામાન્ય ચૂંટણી દેશના શાસક પક્ષ અવામી લીગના ઉમેદવાર તરીકે લડવા ઈચ્છી રહ્યો છે. બાંગ્લાદેશના ક્રિકેટ કેપ્ટન શાકિબ અલ હસને અનેક પ્રસંગોએ વડા પ્રધાન શેખ હસીના સાથે મુલાકાત કરી છે.
બાંગ્લાદેશના ક્રિકેટ સુપરસ્ટાર શાકીબ અલ હસને આવતા વર્ષે તારીખ 7મી જાન્યુઆરીએ યોજાનારી આગામી સામાન્ય ચૂંટણીમાં ભાગ લેવા માટે સત્તાધારી બાંગ્લાદેશ અવામી લીગ (બીએએલ)માંથી નોમિનેશન માગ્યું છે, જેના માટે તેણે ઔપચારિક રીતે રાજકારણમાં પ્રવેશ કર્યો છે.
બીએએલના જોઇન્ટ સેક્રેટરી જનરલ બહાઉદ્દીન નસીમે ન્યૂઝ એજન્સી એએફપીને જણાવ્યું હતું કે, શાકિબે ચૂંટણીમાં ત્રણ મતવિસ્તારોમાં ચૂંટણી લડવા માટે શનિવારે પાર્ટી પાસેથી ઉમેદવારી ફોર્મ લીધા હતા. મુખ્ય વિરોધ પક્ષો દ્વારા મતદાનનો બહિષ્કાર કરવામાં આવનાર છે.
ક્રિકેટ ઓલરાઉન્ડરનું સ્વાગત કરતા નસીમે કહ્યું કે, "તે એક સેલિબ્રિટી છે અને દેશના યુવાનોમાં તેની ઘણી લોકપ્રિયતા છે. શાકિબની ઉમેદવારીની પુષ્ટિ વડા પ્રધાન શેખ હસીનાની અધ્યક્ષતાવાળી શાસક પક્ષના સંસદીય બોર્ડે કરવી પડશે.
નસીમે જણાવ્યું હતું કે, તેમને આશા છે કે તેઓ કાં તો તેમના દક્ષિણ-પશ્ચિમ ગૃહ જિલ્લા મગુરામાં અથવા રાજધાની ઢાકામાં એક બેઠક પર ચૂંટણી લડશે.
હસીના છેલ્લા 15 વર્ષથી લગભગ 17 કરોડ લોકોની વસ્તી ધરાવતા દક્ષિણ એશિયાઇ દેશનું નેતૃત્વ કરી રહી છે અને તેના પર લોખંડની મુઠ્ઠીથી શાસન કરવાનો આરોપ છે. જો વિપક્ષનો બહિષ્કાર આગળ વધે તો ચોથી વખત સત્તામાં પાછા ફરવાનું લગભગ નક્કી માનવામાં આવે છે.
હસીનાએ પ્રભાવશાળી આર્થિક વિકાસની દેખરેખ રાખી છે, પરંતુ પશ્ચિમી રાષ્ટ્રોએ લોકશાહી પીછેહઠને લઈને ચેતવણી ઉચ્ચારી છે. છેલ્લી બે ચૂંટણીમાં વિપક્ષે તેમના પર વોટ-હેરાફેરીનો આરોપ લગાવ્યો છે.
બાંગ્લાદેશના ભૂતપૂર્વ ક્રિકેટ કેપ્ટન મશરફે મોર્તઝા ૨૦૧૮ માં રાજકારણમાં જોડાયો હતો અને તે જ વર્ષે શાસક પક્ષમાંથી ધારાસભ્ય તરીકે ચૂંટાયા હતા. તેણે 2019ના વર્લ્ડ કપમાં બાંગ્લાદેશનું સુકાન સંભાળ્યું હતું અને ત્યાર બાદ રાજકારણ પર ધ્યાન કેન્દ્રિત કરવા માટે આ રમત છોડી દીધી હતી.
ત્રણેય ફોર્મેટમાં બાંગ્લાદેશનો નિયમિત કેપ્ટન શાકીબ હાલમાં આંગળીમાં ઈજાના કારણે પરેશાન છે, જેના કારણે તેને ન્યુઝીલેન્ડ સામેની આગામી ટેસ્ટ શ્રેણી છોડવી પડી છે.
શ્રીલંકા સામેની વર્લ્ડ કપમાં એક મેચ દરમિયાન તેમને આ ઈજા થઈ હતી, જ્યારે એન્જેલો મેથ્યુસ સામેની એક અસામાન્ય અપીલ બાદ તેઓ હેડલાઇન્સ બન્યા હતા, જેના પરિણામે આંતરરાષ્ટ્રીય ક્રિકેટનો સૌપ્રથમ વખત ટાઇમઆઉટ થયો હતો.
Comment / Reply From
You May Also Like
Popular Posts
Newsletter
Subscribe to our mailing list to get the new updates!