કેનેડા સાથેના તણાવ વચ્ચે અમેરિકાએ ભારતને તપાસમાં સહકાર આપવા વિનંતી કરી

ખાલિસ્તાની આતંકવાદી હરદીપ સિંહ નિજ્જરની હત્યાને પગલે ભારત અને કેનેડા વચ્ચે ચાલી રહેલા વિવાદ પર અમેરિકાએ ફરી એકવાર નિવેદન આપ્યું. કેનેડાએ ભારત પર લગાવેલા આરોપોને ચિંતાનો વિષય ગણાવતા અમેરિકાના વિદેશ વિભાગે તેના સ્ટેન્ડનો પુનરોચ્ચાર કર્યો અને કહ્યું કે ભારતે તપાસમાં સહકાર આપવો જોઈએ.

અમેરિકાના વિદેશ વિભાગના પ્રવક્તા મેથ્યુ મિલરે કહ્યું કે આ મામલે સંપૂર્ણ અને નિષ્પક્ષ તપાસની જરૂર છે. મિલરે કહ્યું કે, અમે કેનેડાના પ્રધાનમંત્રી જસ્ટિન ટ્રુડોના આરોપોની તપાસ કરી છે. અમે આ અંગે ખૂબ જ ચિંતિત છીએ. અમને લાગે છે કે આ આરોપોની સંપૂર્ણ અને નિષ્પક્ષ તપાસ થવી જોઈએ. કેનેડાની સરકારે કહ્યું છે કે તે આમ કરવા માટે પ્રતિબદ્ધ છે. અમારું માનવું છે કે ભારત સરકારે આ મામલે સહકાર આપવો જોઈએ.

જ્યારે ભારત-કેનેડા સંબંધો અને અમેરિકા-ભારત સંબંધો પર તેની અસર વિશે પૂછવામાં આવ્યું ત્યારે મિલરે કહ્યું કે ભારત હજી પણ અમેરિકા માટે એક મહત્વપૂર્ણ ભાગીદાર છે, પરંતુ અમેરિકાએ ભારતને આ બાબતે કેનેડા સરકારની તપાસમાં સહયોગ કરવા વિનંતી કરી છે. વધુમાં કહ્યું કે અમે અમારા કેનેડિયન સમકક્ષો સાથે નજીકથી સહયોગ કર્યો છે. અમે ભારત સાથે ઘણા મુદ્દાઓ પર કામ કરીએ છીએ, પરંતુ ચોક્કસપણે આ બાબતે અમે તેમને કેનેડાની તપાસમાં સહયોગ કરવા વિનંતી કરીએ છીએ.

તાજેતરમાં અમેરિકી વિદેશ મંત્રી એન્ટની બ્લિંકને પણ કહ્યું હતું કે કેનેડાના આરોપોને લઈને વોશિંગ્ટન ખૂબ જ ચિંતિત છે અને આ મામલે જવાબદારી જોવા માંગે છે. બ્લિંકને કહ્યું હતું કે અમેરિકાએ ભારત સરકાર સાથે સીધી વાત કરી છે.