અમિત શાહના ડિપફેક વીડિયોનો મામલો, ઝારખંડ કોંગ્રેસનું X એકાઉન્ટ સસ્પેન્ડ
લોકસભા ચૂંટણીના માહોલ વચ્ચે કોંગ્રેસને મોટો ઝટકો લાગ્યો છે. ઝારખંડ કોંગ્રેસના હેન્ડલ પર કાર્યવાહી કરીને Xએ તેના પર પ્રતિબંધ મૂક્યો છે. વિગતો મુજબ આ એક્સ હેન્ડલ પરથી કેન્દ્રીય ગૃહમંત્રી અમિત શાહનો ફેક વીડિયો પોસ્ટ કરવામાં આવ્યો હતો. જે બાદ કાયદેસરની કાર્યવાહીની માંગ કરવામાં આવી હતી..જેને લઇને પોલીસ એક્શનમાં આવી હતી અને આ કાર્યવાહી કરાઇ છે.
-- દિલ્હી પોલીસે મોકલ્યું સમન્સ :- દિલ્હી પોલીસે ઝારખંડ કોંગ્રેસ સોશિયલ મીડિયા સેલના પ્રમુખ ગજેન્દ્ર સિંહને સમન્સ અને નોટિસ મોકલી છે. ગજેન્દ્ર સિંહે કહ્યું કે, તાત્કાલિક નોટિસનો જવાબ આપવો મુશ્કેલ છે. તેમને 3 મેના રોજ સ્પેશિયલ IT સેલ સમક્ષ હાજર થવા માટે પણ કહેવામાં આવ્યું છે. પાર્ટી તેના કાયદાકીય સલાહકારો પાસેથી સલાહ લઈ રહી છે. પક્ષના પ્રવક્તાએ બુધવારે જણાવ્યું કે. ઝારખંડ કોંગ્રેસ અધ્યક્ષ રાજેશ ઠાકુરને કેન્દ્રીય ગૃહ પ્રધાન અમિત શાહના ફેક વીડિયોની તપાસના સંદર્ભમાં દિલ્હી પોલીસે 2 મેના રોજ સમન્સ મોકલ્યા છે. તેમણે કહ્યું કે, ઠાકુરને 28 એપ્રિલે સ્પેશિયલ સેલ દ્વારા નોંધવામાં આવેલી FIRના સંબંધમાં દિલ્હી પોલીસની ઈન્ટેલિજન્સ ફ્યુઝન એન્ડ સ્ટ્રેટેજિક ઓપરેશન્સ (IFSO) ઓફિસમાં તપાસમાં જોડાવા માટે કહેવામાં આવ્યું છે.
-- મને નોટિસ મોકલવી એ માત્ર અરાજકતા :- ઝારખંડ કોંગ્રેસ અધ્યક્ષ રાજેશ ઠાકુરે કહ્યું, મને મંગળવારે દિલ્હી પોલીસ તરફથી નોટિસ મળી હતી પરંતુ મને નોટિસ કેમ આપવામાં આવી તે મારી સમજની બહાર છે. આ અરાજકતા સિવાય બીજું કંઈ નથી. જો કોઈ ફરિયાદ હોય તો તેઓએ પહેલા મારા X એકાઉન્ટની સામગ્રીની ચકાસણી કરવી જોઈએ. ચૂંટણી પ્રચાર ચરમસીમાએ છે અને પ્રચારમાં મારી ભાગીદારી સમજી શકાય તેવી છે. આવી સ્થિતિમાં તેઓએ મારું લેપટોપ અને અન્ય ઇલેક્ટ્રોનિક ગેજેટ્સ માંગ્યા છે. વસ્તુઓની ચકાસણી કર્યા વિના સમન્સ મોકલવું યોગ્ય નથી.
