ઝાંસીની હોસ્પિટલમાં આગથી બાળકોના મોતનો મામલો, કોંગ્રેસે કહ્યું દોષિતો સામે કડક કાર્યવાહી થાય

ઝાંસીની મેડિકલ કોલેજમાં શુક્રવારે રાત્રે એક મોટો અકસ્માત થયો હતો. અહીં NICU વોર્ડમાં લાગેલી આગને કારણે 10 બાળકોના મોત થયા છે. કોંગ્રેસ અધ્યક્ષ મલ્લિકાર્જુન ખડગેએ આ ઘટના પર દુખ વ્યક્ત કર્યું છે અને દોષિતો સામે કાર્યવાહી કરવાની માંગ કરી છે.

કોંગ્રેસ અધ્યક્ષે સોશિયલ મીડિયા પ્લેટફોર્મ પર લખ્યું આ હૃદયદ્રાવક અકસ્માતમાં મૃત્યુ પામેલા તમામ બાળકોના પરિવારો પ્રત્યે અમારી ઊંડી સંવેદના છે. ભગવાન તેમના પરિવારને આ દુઃખ સહન કરવાની શક્તિ આપે. તેમણે વધુમાં કહ્યું કે, અમે સરકાર પાસે માંગણી કરીએ છીએ કે આ અકસ્માતના કારણોની તપાસ થવી જોઈએ અને આવી બેદરકારી માટે દોષિત હોય તેની સામે કડક કાયદાકીય કાર્યવાહી કરવામાં આવે.

શું છે સમગ્ર ઘટના ?
ઝાંસીની મહારાની લક્ષ્મીબાઇ હોસ્પિટલના ચિલ્ડ્રન વોર્ડમાં 50થી વધુ બાળકોને દાખલ કરાયા હતા. શુક્રવારે રાત્રે લગભગ સાડા દસ વાગ્યા હતા. હૉસ્પિટલની દિનચર્યા દરરોજની જેમ જ હતી. સ્ટાફ પોતપોતાના કામમાં વ્યસ્ત હતો. ડોકટરો પોતાનું કામ કરી રહ્યા હતા. માતા-પિતા રાહ જોઈ રહ્યા હતા કે તેઓ તેમના નાના બાળકોને ક્યારે ઘરે લઈ જશે. પરંતુ પછી અચાનક કંઈક એવું બન્યું કે આગલી 10 મિનિટમાં જ બધું બરબાદ થઈ ગયું. જાણે માતા-પિતાની દુનિયા ખતમ થઈ ગઈ..

સર્વત્ર જ્વાળાઓ, અરાજકતા અને ચીસો
…એનઆઈસીયુની અંદર અચાનક આગની જ્વાળાઓ વધવા લાગી. જેના કારણે કોરિડોર ધુમાડાથી ભરાઈ ગયો હતો. શું થયું તે કોઈ સમજી શક્યું નહીં. હોસ્પિટલમાં અરાજકતા ફેલાઈ ગઈ હતી. સર્વત્ર ચીસાચીસનો માહોલ હતો. સ્ટાફ અહીં-તહીં દોડવા લાગ્યો હતો. અચાનક શોર્ટ સર્કિટ થતાં આગ ફાટી નીકળી હતી. ત્યાં હાજર સ્ટાફ અને લોકોએ આગ ઓલવવાનો પૂરો પ્રયાસ કર્યો હતો. પરંતુ થોડી જ વારમાં આગ ભીષણ જ્વાળાઓમાં ફેરવાઈ ગઈ હતી.

NICUમાં આગ કેવી રીતે ફેલાઈ?
મોટાભાગના બાળકો ઓક્સિજન સપોર્ટ પર હોવાથી આગ વધુ ઝડપથી ફેલાઈ રહી હતી. બાળકોના પલંગથી શરૂ કરીને ત્યાં હાજર દરેક વસ્તુ સળગવા લાગી અને 10 બાળકો સંપૂર્ણ રીતે દાઝી ગયા. મોટી સંખ્યામાં બાળકો ગંભીર રીતે ઘાયલ થયા હતા. બહાર હાજર બાળકોનો આબાદ બચાવ થયો હતો.