હરિયાણા, જીત્યા છે ઝારખંડ,મહારાષ્ટ્ર જીતીશું, પછીનું લક્ષ્ય બંગાળઃ અમિત શાહ

કેન્દ્રીય ગૃહ પ્રધાન અમિત શાહે રવિવારે કોલકાતામાં ભાજપ સભ્યપદ અભિયાનનું ઉદ્ઘાટન કર્યું. તેમણે કહ્યું કે પાર્ટીનું આગામી મોટું લક્ષ્ય પશ્ચિમ બંગાળમાં સરકાર બનાવવાનું છે. અમિત શાહે રાજ્યની બે દિવસીય મુલાકાત દરમિયાન આ વાત કહી.તેમણે કહ્યું, “અમે હરિયાણામાં જીત્યા છીએ. અમે ઝારખંડ અને મહારાષ્ટ્રમાં પણ જીતીશું. ત્યાર બાદ અમારું લક્ષ્ય બંગાળ છે.” ગૃહમંત્રીએ કહ્યું કે જો ભાજપ રાજ્યમાં એક કરોડ સભ્યો એકઠા કરશે તો પાર્ટી સત્તામાં આવશે. રાજ્યમાં આગામી વિધાનસભા ચૂંટણી 2026માં યોજાવા જઈ રહી છે.

-> રાજ્યમાં સુરક્ષાનો પ્રશ્ન :- કેન્દ્રીય ગૃહ પ્રધાન અમિત શાહે કહ્યું કે બાંગ્લાદેશ પશ્ચિમ બંગાળ સાથે આંતરરાષ્ટ્રીય સરહદ વહેંચે છે. અમિત શાહે તૃણમૂલ કોંગ્રેસ સરકાર પર “રાજ્ય પ્રાયોજિત ઘૂસણખોરી”નો આરોપ મૂક્યો.. તેમણે યુવાનોને અપીલ કરી કે જો તેઓ આ ઘૂસણખોરી રોકવા માંગતા હોય તો 2026માં ભાજપની સરકારને ચૂંટે.અમિત શાહે આર.જી.મેડિકલ કોલેજ અને હોસ્પિટલમાં મહિલા ડોક્ટર પર બળાત્કાર અને હત્યાના કેસનો પણ ઉલ્લેખ કર્યો. તેમણે કહ્યું, “પશ્ચિમ બંગાળમાં માતાઓ અને બહેનો સુરક્ષિત નથી. જો ભાજપ સત્તામાં આવશે તો આવા મામલા બંધ થઈ જશે.

-> તૃણમૂલ કોંગ્રેસનો પલટવાર :- દરમિયાન, તૃણમૂલ કોંગ્રેસના નેતા કુણાલ ઘોષે અમિત શાહના આરોપોનો જવાબ આપતા કહ્યું કે આવા નેતાઓ પશ્ચિમ બંગાળમાં માત્ર રાજકીય ભાષણ આપવા આવે છે. તેમણે સવાલ ઉઠાવ્યો હતો કે અમિત શાહે આર.જી હોસ્પિટલ રેપ કેસની પીડિતાના માતા-પિતાને કેમ ન મળ્યા? તૃણમૂલ કોંગ્રેસના નેતાએ કહ્યું કે ભાજપ શાસિત રાજ્યોમાં મહિલાઓ વિરુદ્ધ હિંસાની ઘટનાઓ વારંવાર બની રહી છે પરંતુ તેના પર કોઈ વાત નથી થઈ રહી.