પીએમ મોદીએ ‘મનકી બાત’માં ડિઝિટલ અરેસ્ટનો મુદ્દો ઉઠાવ્યા બાદ ગૃહ મંત્રાલય એક્શનમાં

દેશમાં ડિજિટલ અરેસ્ટ ટેક્સ ફ્રોડના વધી રહેલા મામલાઓને જોતા કેન્દ્રીય ગૃહ મંત્રાલય એક્શનમાં આવ્યું છે. મંત્રાલયે આ અંગે ઉચ્ચ સ્તરીય સમિતિની રચના કરી છે. આ કમિટી ડિજિટલ ધરપકડના કેસોની તપાસ કરતી સંબંધિત એજન્સી અથવા પોલીસની તપાસ પર નજર રાખશે. મહત્વનું છે કે વડાપ્રધાને મન કી બાતમાં ડિજિટલ ધરપકડ વિરુદ્ધ વાત કરી હતી.વિશેષ સચિવ આંતરિક સુરક્ષા આ સમિતિનું નેતૃત્વ કરશે. કમિટીને ગુનેગારો સામે તાત્કાલિક કાર્યવાહી કરવા સૂચના આપવામાં આવી છે. સૂત્રોના જણાવ્યા અનુસાર ગૃહ મંત્રાલયના આંતરિક સુરક્ષા સચિવ દ્વારા સમિતિની દેખરેખ ચાલુ રહેશે. ગૃહ મંત્રાલયના સાયબર ક્રાઈમ કોઓર્ડિનેશન સેન્ટર, જેને 14C તરીકે પણ ઓળખવામાં આવે છે, તેણે તમામ રાજ્યો અને કેન્દ્રશાસિત પ્રદેશોની પોલીસનો સંપર્ક કર્યો છે અને તેમને સમિતિ વિશે માહિતી આપી છે.

-> આ વર્ષે અત્યાર સુધીમાં 6 હજારથી વધુ કેસ નોંધાયા છે :- આ વર્ષે અત્યાર સુધીમાં દેશભરમાં ડિજિટલ ધરપકડના 6,000 થી વધુ કેસ નોંધાયા છે. આમાં 14Cએ કૌભાંડના સંબંધમાં 6 લાખ મોબાઈલ નંબર બ્લોક કર્યા છે, જે લોકોને ડ્રગ્સ અને મની લોન્ડરિંગના કેસમાં ખોટી રીતે ફસાવીને નિશાન બનાવે છે. સાયબર ક્રાઈમ કોઓર્ડિનેશન સેન્ટરે પણ ઓછામાં ઓછી 709 મોબાઈલ એપ્લિકેશનને બ્લોક કરી દીધી છે. સૂત્રોએ જણાવ્યું હતું કે સત્તાવાળાઓએ સાયબર ફ્રોડ સંબંધિત 3.25 લાખ નકલી બેંક ખાતાઓને ફ્રીઝ કરવાનો આદેશ પણ આપ્યો છે.

-> પીએમ મોદીએ મન કી બાતમાં લોકોને એલર્ટ કર્યા હતા :- વડાપ્રધાન નરેન્દ્ર મોદીએ તેમના ‘મન કી બાત’ના 115મા એપિસોડમાં દેશવાસીઓને ડિજિટલ ધરપકડ સામે એલર્ટ કર્યા હતા. તેમણે આ નવી છેતરપિંડીથી બચવા માટે ‘રોકો, વિચારો અને પગલાં લો’નો મંત્ર આપ્યો હતો. દરમિયાન, ભારત સરકારના ગૃહ મંત્રાલય દ્વારા 2024 ના પ્રથમ ત્રિમાસિક ગાળામાં ડિજિટલ ધરપકડ અંગે જાહેર કરવામાં આવેલ ડેટા ખૂબ જ આઘાતજનક છે. આ આંકડાઓ અનુસાર, જાન્યુઆરીથી એપ્રિલ 2024 વચ્ચે ડિજિટલ અરેસ્ટને કારણે લોકોને 120 કરોડ રૂપિયાથી વધુનું નુકસાન કર્યું છે.

-> 46 ટકા ગુનાઓ અન્ય દેશોમાંથી આચરવામાં આવે છે :- જ્યારે ગૃહ મંત્રાલય હેઠળના ભારતીય સાયબર ક્રાઈમ કોઓર્ડિનેશન સેન્ટરે 2024માં જાન્યુઆરીથી એપ્રિલ દરમિયાન ડિજિટલ ધરપકડના કેસોનો અભ્યાસ કર્યો ત્યારે જાણવા મળ્યું કે આ રીતે છેતરપિંડીના મોટાભાગના કેસો દક્ષિણ એશિયાના દેશો કંબોડિયા, લાઓસ અને મ્યાનમારમાંથી થયા હતા.કુલ ગુનામાંથી 46% આ ત્રણ દેશોમાંથી ઓપરેટ કરવામાં આવ્યા છે. અત્યાર સુધીમાં ભારતમાં લોકોને ડિજિટલ અરેસ્ટ દ્વારા લગભગ 1776 કરોડ રૂપિયાનું નુકસાન થયું છે.