દવાઓની આડઅસર જણાવવાનું ફરજિયાત કરવાનો મામલો, અરજી પર સુનાવણીનો સુપ્રીમનો ઇન્કાર

સુપ્રીમ કોર્ટે તે અરજી પર સુનાવણી કરવાનો ઇનકાર કરી દીધો છે જેમાં ડોકટરો માટે દર્દીઓને દવાઓની આડઅસરો વિશે જણાવવાનું ફરજિયાત બનાવવાની માંગ કરવામાં આવી હતી. જસ્ટિસ બીઆર ગવઈ અને કેવી વિશ્વનાથનની બેન્ચે આ માંગણીને અવ્યવહારુ ગણાવી હતી.એડવોકેટ પ્રશાંત ભૂષણ કેરળના એર્નાકુલમના રહેવાસી અરજદાર જેકબ વાડાકનચેરી વતી કોર્ટમાં હાજર થયા હતા. વર્લ્ડ હેલ્થ ઓર્ગેનાઈઝેશન (WHO)ના રિપોર્ટને ટાંકીને તેમણે કહ્યું કે દુનિયાભરમાં મોટી સંખ્યામાં લોકો દવાઓની આડ અસરનો શિકાર બને છે. પ્રિસ્ક્રિપ્શન લખતી વખતે ડોકટરો માટે દરેક દવાની આડઅસરો વિશેની માહિતી રેકોર્ડ કરવી ફરજિયાત બનાવવી જોઈએ.

તેના પર ન્યાયાધીશોએ કહ્યું કે આ રીતે ડૉક્ટર આખા દિવસમાં 10-15થી વધુ દર્દીઓને જોઈ શકશે નહીં. ભૂષણે કહ્યું કે ડોકટરો દવાઓની આડઅસર વિશેની માહિતી પ્રી-પ્રિન્ટેડ ફોર્મેટમાં દાખલ કરી શકે છે. કોર્ટે કહ્યું, “દરેક દર્દીને અલગ-અલગ દવાઓ આપવામાં આવે છે. પૂર્વ-લિખિત ફોર્મેટનું સૂચન પણ વ્યવહારુ લાગતું નથી.”જસ્ટિસ ગવઈએ કહ્યું કે ભારતમાં સ્વાસ્થ્ય કેન્દ્રો પહેલાથી જ ખૂબ ગીચ છે. આવી સ્થિતિમાં, દરેક દર્દીના પ્રિસ્ક્રિપ્શન પર દવાઓની આડઅસર લખવા માટે ડૉક્ટરો કેવી રીતે સમય કાઢી શકે? ડોકટરો પહેલેથી જ નારાજ છે કે તેમનું કામ ગ્રાહક સુરક્ષા કાયદા હેઠળ મૂકવામાં આવ્યું છે.