akshay 
અરુણાચલ પ્રદેશને લઈને ભારત અને ચીન વચ્ચે ફરી એકવાર તણાવ વધી રહ્યો છે. આ વખતે મામલો અરુણાચલ પ્રદેશના એક શિખરને નામ આપવાથી શરૂ થયો છે. હકીકતમાં, ભારતે અરુણાચલ પ્રદેશમાં એક શિખરને છઠ્ઠા દલાઈ લામા, ત્સાંગ્યાંગ ગ્યાત્સોના નામ પર નામ આપવાનો નિર્ણય કર્યો છે. ભારતના આ નિર્ણયથી ચીન નારાજ થઈ ગયું છે અને તેણે આ નિર્ણયનો વિરોધ કરીને ફરી એકવાર આ વિસ્તાર પર પોતાનો દાવો દાખવ્યો છે. આ અંગે ગુરુવારે ચીને શિખરનું નામકરણ કરવા પર નારાજગી વ્યક્ત કરી હતી. ચીને ફરીવાર અરુણાચલ પ્રદેશને પોતાના વિસ્તાર જંગનાનનો ભાગ ગણાવ્યો છે.
-> શા માટે શિખરનું નામ છઠ્ઠા દલાઈ લામાના નામ પરથી રાખવામાં આવ્યું છે? :- નેશનલ ઇન્સ્ટિટ્યૂટ ઓફ માઉન્ટેનિયરિંગ એન્ડ એડવેન્ચર સ્પોર્ટ્સ (NIMS)ની એક ટીમે અરુણાચલ પ્રદેશમાં 20,942 ફૂટના અનામી શિખર પર સફળતાપૂર્વક ચઢાણ કર્યું. આ પછી ટીમે આ શિખરને છઠ્ઠા દલાઈ લામા ત્સાંગયાંગ ગ્યાત્સોના નામ પર રાખવાનો નિર્ણય કર્યો છે.NIMS સંરક્ષણ મંત્રાલય હેઠળ કાર્ય કરે છે અને તે અરુણાચલ પ્રદેશના દિરાંગમાં સ્થિત છે. શિખરને નામ આપવા અંગે, સંરક્ષણ મંત્રાલય તરફથી એક પ્રેસ રિલીઝમાં કહેવામાં આવ્યું છે કે શિખરનું નામ છઠ્ઠા દલાઈ લામાના નામ પર રાખવું એ તેમની બુદ્ધિ અને તેમના યોગદાનને શ્રદ્ધાંજલિ છે.
-> ભારતના નિર્ણયને ચીને ગેરકાયદે અને અમાન્ય ગણાવ્યો :- જ્યારે ચીનના વિદેશ મંત્રાલયના પ્રવક્તા લિન જિયાનને આ મામલે સવાલ પૂછવામાં આવ્યો ત્યારે તેમણે પ્રેસ કોન્ફરન્સમાં કહ્યું, “તમે શું કહ્યું તેની મને જાણ નથી.” જંગનાનનો વિસ્તાર ચીનનો વિસ્તાર છે અને ભારત દ્વારા ચીનના પ્રદેશમાં અરુણાચલ પ્રદેશની સ્થાપના ગેરકાયદેસર અને અમાન્ય છે.અરુણાચલ પ્રદેશને લઈને ભારત અને ચીન વચ્ચે વર્ષોથી વિવાદ ચાલી રહ્યો છે. ચીન અરુણાચલ પ્રદેશને જંગનાન કહે છે. ભારતે હંમેશા ચીનના આ દાવાઓને ફગાવી દીધા છે અને અરુણાચલ પ્રદેશને દેશનો અભિન્ન અંગ ગણાવ્યો છે.
