દિલ્હીની પ્રદુષિત હવા બની વૈશ્વિક સ્તર પર શરમમાં મુકાવવાનું કારણ, COP29 સમિટમાં થઇ ચર્ચા

દિલ્હી-એનસીઆરની ખરાબ હવા અહીંના લોકોની મુશ્કેલીઓ તો વધારી રહી છે, પરંતુ આંતરરાષ્ટ્રીય સ્તરે ભારત માટે શરમનું કારણ પણ બની રહી છે. અન્ય દેશોએ આ અંગે ચર્ચા શરૂ કરી છે. અઝરબૈજાનની રાજધાની બાકુમાં આયોજિત પર્યાવરણ પર COP29 સમિટમાં આવું જ દ્રશ્ય જોવા મળ્યું હતું. આ કોન્ફરન્સમાં દિલ્હીના સતત વધી રહેલા એર ક્વોલિટી ઈન્ડેક્સ પર ઘણી ચર્ચા થઈ હતી.

નિષ્ણાતોએ વાયુ પ્રદૂષણના સ્વાસ્થ્ય જોખમો વિશે ચેતવણી આપી હતી અને તાત્કાલિક વૈશ્વિક પગલાં લેવા હાકલ કરી હતી. ક્લાઈમેટ ટ્રેન્ડ્સના ડિરેક્ટર આરતી ખોસલાએ જણાવ્યું હતું કે દિલ્હીનો AQI ખતરનાક સ્તરે પહોંચી ગયો છે, કેટલાક વિસ્તારોમાં 1,000 માઈક્રોગ્રામ પ્રતિ ઘન મીટરથી વધુના રજકણનું પ્રદૂષણ નોંધાયું છે. બ્લેક કાર્બન, ઓઝોન, અશ્મિભૂત ઇંધણને બાળી નાખવા અને ખેતરની આગ જેવા ઘણા સ્ત્રોતો દ્વારા પ્રદૂષણ થાય છે. તેમણે કહ્યું કે અમને એવા ઉકેલની જરૂર છે જે આ બધા સામે કામ કરે.

-> દિલ્હીમાં શ્વાસ લેવો એ 49 સિગારેટ પીવા બરાબર છે :- નિષ્ણાતે એમ પણ કહ્યું કે દિલ્હીની હવા એટલી ઝેરી થઈ ગઈ છે કે હવે તે દરરોજ 49 સિગારેટ પીવા બરાબર છે. ખોસલાએ એ પણ ધ્યાન દોર્યું હતું કે લા નીના વેધર પેટર્ન દરમિયાન પવનની નીચી ઝડપ હવામાં પ્રદૂષકોને ફસાવી રહી છે, જે પરિસ્થિતિને વધુ ખરાબ બનાવે છે.

-> કેનેડાનો ઉલ્લેખ કરીને ટોણો મારવાનો પ્રયાસ :- ગ્લોબલ ક્લાઈમેટ એન્ડ હેલ્થ એલાયન્સના વાઈસ પ્રેસિડેન્ટ કર્ટની હોવર્ડે કેનેડાનો પોતાનો અનુભવ શેર કરતા કહ્યું કે 2023માં જંગલમાં લાગેલી આગને કારણે 70 ટકા વસ્તીએ વિસ્તાર ખાલી કરવો પડ્યો હતો. આપણા જેવા સમૃદ્ધ દેશ માટે પણ આ ખર્ચાળ હતું. તેમણે કહ્યું કે ગરીબ દેશોને આવી આફતોનો સામનો કરવા માટે આર્થિક મદદની જરૂર છે.

-> ‘બાળકોના ફેફસાં નબળાં થઈ રહ્યાં છે :- બ્રેથ મંગોલિયાના સહ-સ્થાપક એન્ખુન બ્યામ્બદોર્જે તેમના દેશમાં વાયુ પ્રદૂષણની ગંભીર સમસ્યા પર પ્રકાશ પાડ્યો હતો. તેમણે કહ્યું કે શહેરોમાં રહેતા બાળકોના ફેફસાની ક્ષમતા ગ્રામીણ વિસ્તારોમાં રહેતા બાળકો કરતા 40 ટકા ઓછી છે. આપણે જે હવામાં શ્વાસ લઈએ છીએ તે સમાજ તરીકે આપણી પસંદગી છે, પરંતુ તે આપણા બાળકોના ભવિષ્યને નુકસાન પહોંચાડે છે.